फेरी अर्की बालिका बलात्कृत

रौतहटमा १३ वर्षीया बालिका बलात्कृत

२५ साउन, रौतहट । रौतहटको गंगा पिप्रा-४ कि १३ वर्षीया एक बालिकामाथि सामूहिक बलात्कार भएको छ । बिहीबार राति आफ्नै घरमा सुतिरहेकी बालिकालाई दुई युवकले घरबाट बाहिर लगी बलात्कार गरेका हुन् । शुक्रबार बिहान स्थानीय तथा प्रहरीले बाँसघारीमा अचेत अवस्थामा बालिका देखेपछि उद्दार गरी जिल्ला अस्पताल गौर पुर्‍याएका थिए ।

उनलाई स्थानीय बच्चु महतो र अर्का एक व्यक्तिले निदाएकै अवस्थामा बोकेर लगेको पीडित बालिकाले बताएकी छिन । ‘बुवा-आमा पल्लो कोठामा सुत्नु भएको थियो । म र भाई यता अर्को कोठामा सुतेकी थिए । राति अचानक निद्रा खुल्दा दुई युवकले आफूलाई बाँस घारीमा ल्याएको देखेँ’ पीडित बालिकाले भनिन्-’दुई जना मध्ये एक जनालाई चिन्छु त्यो बच्चु थियो अर्कोलाई चिन्न सकिन ।’

घटनामा संलग्न रहेको आरोप लागेका स्थानीय बच्चु महतोलाई प्रहरीले पक्राउ गरेको छ भने अर्का आरोपी फरार रहेको प्रहरी उपरीक्षक गोबिन्द राम परियारले जानकारी दिनु भएको छ ।